Moskva, Kiyev və Vaşinqtonun iştirakı ilə Rusiya-Ukrayna münaqişəsinin həlli ilə bağlı üçtərəfli görüş martın əvvəlinə qədər təxirə salınıb və hazırda danışıqların keçiriləcəyi məkan razılaşdırılır.
Primeinfo.az xəbər verir ki, bu barədə TASS rəsmi mənbələrə istinadla məlumat yayıb.
Görüşün fevralın 26-da Cenevrədə keçiriləcəyi bildirilirdi. Lakin son məlumata görə, ABŞ-Ukrayna danışıqları da həmin günə planlaşdırılıb.
DW-nin məlumatına görə, fevralın 25-də Ukrayna Prezidenti Volodimir Zelenski ABŞ lideri Donald Trampla telefon danışığı aparıb. Söhbət zamanı Ukrayna ilə Rusiya arasında danışıqlar prosesi müzakirə olunub.
“Nümayəndələrimizin sabah Cenevrədə ikitərəfli görüşdə üzərində işləyəcəkləri məsələləri, eləcə də martın əvvəlində üçtərəfli formatda tam danışıqlar qruplarının növbəti görüşünə hazırlıqları müzakirə etdik”, – deyə Zelenski bildirib.
O qeyd edib ki, Trampın müzakirəçiləri Stiv Uitkoff və Cared Kuşner də telefon danışığında iştirak ediblər. Ukrayna lideri Ukrayna-Rusiya görüşlərinin növbəti raundunun “liderlər səviyyəsində danışıqlara keçməyə imkan verəcəyinə” ümidvar olduğunu bildirib və qeyd edib ki, Tramp bu addımların ardıcıllığını dəstəkləyir.
