İranın regionda həyata keçirdiyi son hərbi əməliyyatlar və hava zərbələri qonşu körfəz ölkələrinə də sıçrayıb, mülki şəxslər arasında xəsarət alanlar var.
Primeinfo.az xəbər verir ki, Qətərin Daxili İşlər Nazirliyi ölkə ərazisinə düşən zərbələr və qəlpələr nəticəsində ilk rəsmi yaralıların olduğunu bəyan edib. Nazirliyin yaydığı rəsmi məlumata görə, İran ordusunun hücumları zamanı ətrafa səpələnən mərmi və raket qəlpələrinin isabət etməsi nəticəsində biri azyaşlı uşaq olmaqla, ümumilikdə üç mülki Qətər vətəndaşı müxtəlif dərəcəli bədən xəsarətləri alıb.
Hadisədən dərhal sonra Qətərin hüquq-mühafizə və təhlükəsizlik orqanları daxili təhlükəsizliyi təmin etmək məqsədilə ölkə miqyasında xüsusi həyəcan və xəbərdarlıq sistemini aktivləşdiriblər.
Dövlət rəsmiləri yerli əhaliyə və ölkədə yaşayan xarici vətəndaşlara təcili müraciət edərək, vəziyyət tam sabitləşənə qədər küçələrə çıxmamağı, evlərini tərk etməməyi və qoruyucu, təhlükəsiz sığınacaqlarda qalmağı qəti şəkildə tövsiyə edib.
