Rusiya Federasiyası Kommunist Partiyasının Moskvada “Krestyanskaya Zastava” meydanında keçirdiyi razılaşdırılmış mitinqdə 60-dan çox şəxs saxlanılıb.
Primeinfo.az-ın Kommunist Partiyasına istinadən məlumatına görə, həbslər 4 oktyabr 1993-cü ildə Moskvada baş verən silahlı qarşıdurma zamanı həlak olanların xatirəsinin anılmasının son mərhələsində başlayıb.
“İnqilab Qəhrəmanları” abidəsinin qarşısında keçirilən aksiyaya təxminən 2 min insan qatılıb. Mitinq iştirakçıları “Siyasi məhbuslara azadlıq”, “Dmitri Morozova azadlıq”, “Bondarenko üçün” və “Ədalətli seçkilər uğrunda” şüarları səsləndiriblər.
Moskva Şəhər Dumasının keçmiş deputatı Yevgeni Stupin bildirib ki, saxlanmalar iştirakçıların “Çar istefa etsin!” şüarını səsləndirməsindən sonra başlayıb. Hüquq-mühafizə orqanları hələlik hadisə ilə bağlı şərh verməyib və ya saxlanılanların sayını təsdiqləməyib.
