İranın xarici işlər naziri Abbas Əraqçinin Pakistana rəsmi səfəri çərçivəsində İslamabadda mühüm və strateji əhəmiyyətli bir görüş baş tutub.
Primeinfo.az xəbər verir ki, İranın baş diplomatı Pakistan Silahlı Qüvvələrinin komandanı general Asim Munir ilə bir araya gələrək regionda artan hərbi-siyasi gərginliyi müzakirə edib.
Görüş zamanı tərəflər regional təhlükəsizlik, sərhəd nəzarəti və terrorizmlə mübarizə sahəsində ikitərəfli əməkdaşlığın gücləndirilməsi məsələlərinə xüsusi diqqət yetiriblər. Abbas Əraqçi Yaxın Şərqdəki mövcud vəziyyət fonunda qonşu dövlətlərin koordinasiyalı hərəkət etməsinin vacibliyini vurğulayıb. General Asim Munir isə öz növəsində Pakistanın regional sabitliyin qorunmasında maraqlı olduğunu və İranla hərbi səviyyədə dialoqun davam etdirilməsinin əhəmiyyətini qeyd edib.
Bu görüş, xüsusilə ABŞ və İran arasındakı gərginliyin pik həddə çatdığı və Pakistanın vasitəçilik rolunun müzakirə olunduğu bir dövrdə beynəlxalq birliyin diqqət mərkəzindədir.
Ekspertlər hesab edirlər ki, Tehran və İslamabad arasında hərbi-diplomatik kanalların aktivləşməsi regionda mümkün eskalasiyaların qarşısının alınması baxımından həlledici rol oynaya bilər. Hazırda tərəflər arasında müzakirələrin digər detalları barədə rəsmi açıqlamaların veriləcəyi gözlənilir.
