Artıq sərnişinlər uçuşlarını gözləyərkən film izləyə biləcəklər. Belə ki, “CineMastercard” kinoteatrlar şəbəkəsi Heydər Əliyev Beynəlxalq Aeroportunun uçuş zonasında yeni kinoteatrını istifadəyə verib.
Primeinfo.az-a bu barədə kinoteatr şəbəkəsindən məlumat verilib.
Bildirilib ki, şəbəkə üçün yeni olan bu format sərnişinlərə səyahəti film izləməklə birləşdirməyə, uçuşadək vaxtlarını rahat və xoş keçirməyə şərait yaradır.
Kinoteatrda bir ekran fəaliyyət göstərir və sərnişinlər tranzit zonasını tərk etmədən ailə və macəra filmlərinə baxa biləcəklər. Beləliklə, reysi gözləmək və ya transfer zamanı yaranan fasilə səyahətin xoş hissəsinə çevrilə bilər.
“Kinonu səyahətin bir hissəsinə çevirmək istəyimiz tamaşaçılar üçün yeni imkanlar yaradır — onların marşrutunun ən gözlənilməz nöqtələrində belə. Hava limanı insanların uçuşlarını gözləyərkən xeyli vaxt keçirdikləri bir məkandır. Bu gözləmə müddətini xoş və dolğun istirahətə çevirmək mümkündür”, — deyə “CineMastercard” kinoteatrlar şəbəkəsinin baş direktoru Zaur Darabzadə bildirib.
Qeyd edək ki, bütün film nümayişləri sərnişinlər üçün ödənişsiz olacaq.
Kinoteatrın açılması “CineMastercard”ın müasir kino nümayişi formatlarının inkişafı və tamaşaçılar üçün yeni təəssüratların yaradılması istiqamətində növbəti addımdır.
İldə təxminən 3,8 milyon yola düşən sərnişinin, 2026-cı ilin ilk səkkiz ayında isə 373 mindən çox transfer sərnişininin istifadə etdiyi bu zonada yeni kinoteatrın yaradılması gözləmə müddətini sadəcə keçirmək deyil, onu səyahətin daha rahat və maraqlı bir hissəsinə çevirmək məqsədi daşıyır.
