İyulun 19-da Rusiya ordusu üç raketlə Qara dənizdə taxıl daşıyan Türkiyəyə məxsus “GOLDEN LEO” mülki yük gəmisinə zərbə endirib.
Primeinfo.az NTV-yə istinadən xəbər verir ki, bu barədə Ukrayna Hərbi Dəniz Qüvvələri məlumat yayıb.
Raket hücumu nəticəsində 10 dənizçi həlak olub. Ölənlərdən 9-u əcnəbi ekipaj üzvü, 1-i isə ukraynalı bələdçidir (lotsman).
“İyulun 20-si səhər saatlarına olan məlumata görə, düşmənin xarici mülki gəmiyə endirdiyi zərbə nəticəsində 10 nəfərin öldüyü təsdiqlənib. Daha 7 nəfər isə yaralanıb”, – deyə Odessa Vilayət Prokurorluğundan bildirilib.
Qeyd edilib ki, Qvineya-Bisau bayrağı altında üzən yük gəmisi döyüş zonasını tərk edərkən üç ədəd X-59/X-69 qanadlı raketlə vurulub.
Ukrayna Hərbi Dəniz Qüvvələri hadisəni Qara dənizdə növbəti terror aktı kimi qiymətləndirib.
