Kamboca Krallığının Baş naziri Hun Senin adından Kamboca nümayəndə heyəti Ümumdünya Şəhərsalma Forumunun 13-cü sessiyasının Bakıda birgə təşkilinə görə Azərbaycana və BMT-yə dərin təşəkkürünü bildirir.
Primeinfo.az xəbər verir ki, bunu Bakıda keçirilən Ümumdünya Şəhərsalma Forumunun 13‑cü sessiyası (WUF13) çərçivəsində Liderlər sessiyasında Kambocanın Baş nazirinin müavini Say Samal bildirib.
O qeyd edib ki, son 500 il ərzində davam edən daxili münaqişələr və müharibələr Kambocanı çox həssas bir dövlətə çevirib:
“Fransa müstəmləkəçiliyindən xilas olduqdan sonra Kamboca gənc və dinamik bir ölkə idi. Lakin bu “Qızıl Dövr” uzun çəkmədi. 1960–70-ci illərdə Vyetnam müharibələri nəticəsində Kambocanın şəhərləri viran edildi. 1980-ci illərdə Kamboca “Soyuq müharibə”nin döyüş meydanı idi və ölkə tamamilə dağılmış vəziyyətdə idi.
Sülh, siyasi sabitlik və son iki onillikdə davamlı iqtisadi artım sayəsində Kamboca orta təbəqəli cəmiyyətə doğru irəliləyir. Bu isə bizə yeni Kambocanı qurmaq üçün yeni imkanlar açıb.
Hazırkı hökumət, Baş nazirin rəhbərliyi altında qarşıdakı imkanlardan istifadə edir və biz yeni Kamboca qururuq”.
Kambocalı rəsmi bildirib ki, ölkəsinin şəhərlərində əsas prinsipləri infrastruktur və xidmətləri standartlaşdırmaqdır: “İnsanların qeyri-rəsmi yaşayış məntəqələrindən çıxaraq daha yaxşı şəraitə keçməsi üçün yeni imkanlar yaradırıq. Kamboca yaxın gələcəkdə qeyri-rəsmi məskunlaşmaya son qoymağa ümid edir.
Biz sadəcə mənzil təmin etməyə deyil, “ev” qurmağa diqqət yetiririk. Lakin dəyişən qlobal nizam, biomüxtəlifliyin itirilməsi və iqlim dəyişikliyi son onillikdə Kambocanın inkişafı üçün açıq və ciddi təhdidlərdir. Sülh içində bir dünya bizim milli strateji marağımızdadır. İstixana qazlarının ən az emissiya edən ölkələrindən biri olmasına baxmayaraq, Kamboca iqlim dəyişikliyi və biomüxtəlifliyin qorunması istiqamətində öz üzərinə düşəni ardıcıl şəkildə yerinə yetirib.
Kamboca 2050-ci ilə qədər karbon neytrallığı üzrə uzunmüddətli strategiya təqdim edən ilk az inkişaf etmiş ölkələrdən və ASEAN daxilində ilk ölkə olub. Biz həmçinin milli iqlim strategiyamızı yeniləmişik. İqlim fəaliyyəti üçün daha çox maliyyə ayırır, bərpa olunan enerji mənbələrini genişləndiririk. Aydın milli enerji səmərəliliyi siyasəti qəbul etmişik, yeni ekoloji investisiya qanununu təsdiqləmişik və maliyyə sektorunu “yaşıllaşdırırıq”.
