Türkiyənin Batman vilayətində hakim Ədalət və İnkişaf Partiyasının (AK Parti) rayon təşkilatının sədri Mehmet Direk, onun oğlu və qardaşı oğlu silahlı hücum nəticəsində öldürülüb.
Primeinfo.az bu barədə Türkiyə KİV-ə istinadən xəbər verir.
Hadisə vilayətin Güneykent rayonunda qəbiristanlıqda baş verib. Naməlum şəxs və ya şəxslər Mehmet Direk, oğlu Erkan Direk və qardaşı oğlu Əbu Bəkr Direkə atəş açıblar. Nəticədə hər üç şəxs həyatını itirib.
Atışmadan sonra polis qəbiristanlığı mühasirəyə alıb və istintaq tədbirlərinə başlayıb. Əraziyə giriş-çıxış müvəqqəti məhdudlaşdırılıb.
Hüquq-mühafizə orqanları şübhəli şəxslərin tapılması üçün genişmiqyaslı əməliyyat keçirir. İstintaqçılar müşahidə kameralarının görüntülərini araşdırır və hücum edən şəxslərin qaçış marşrutunu müəyyənləşdirməyə çalışırlar.
