Dünya şöhrətli aktyor Ceki Çan Bakıya gəlib.
Primeinfo.az Qazaxıstanın Bakıdakı səfirliyinə istinadən xəbər verir ki, o, burada “Tanrının zirehi 4: Ultimatum” beynəlxalq macəra filminin bəzi səhnələrinə çəkiləcək.
Məşhur aktyor Azərbaycanın paytaxtında təxminən 10 gün qalacaq.
Filmin əsas çəkiliş meydançası Qazaxıstandır. Manqistau və Almatı vilayətlərində, eləcə də Almatıda çəkilişlər baş tutub. Qazaxıstan tərəfinin təklifi ilə çəkilişlər üçün ikinci ölkə olaraq Azərbaycan seçilib.
Filmin istehsalı ilə Qazaxıstanın “Salem Entertainment” kinokompaniyası məşğul olur. Layihənin prodüseri şirkətin qurucusu Rüstəm Omarov, rejissoru isə namizədliyini şəxsən Ceki Çanın təsdiqlədiyi qazaxıstanlı quruluşçu və kaskadyor Robert Kundur. Bakıdakı çəkilişlərə Qazaxıstanın Azərbaycandakı səfirliyi dəstək göstərir.
Bakıdakı çəkilişlər üçün şəhərin ən çox tanınan görməli yerlərindən bəziləri seçilib. Kadrlarda İçərişəhər, Dağüstü park, Bakı funikulyoru, Yaşıl teatr və Fəvvarələr meydanı görünəcək.
Filmin premyerası 2027-ci ilə planlaşdırılıb.
