İsrailin müdafiə naziri İsrael Kats ABŞ, İsrail və Livan arasında imzalanmış razılaşmanı “tarixi hadisə” və “mühüm diplomatik uğur” adlandırıb.
Primeinfo.az xəbər verir ki, onun sözlərinə görə, sənəd son onilliklər ərzində ilk dəfə İsrailin şimal sərhədində və Livanda daha təhlükəsiz reallığın formalaşmasına zəmin yarada bilər.
Nazir bildirib ki, İsrail ordusu Livanın cənubundakı təhlükəsizlik zonasını, o cümlədən Bofor silsiləsini tərk etməyəcək.
Onun sözlərinə görə, “Hizbullah” bütün Livan ərazisində silahsızlaşdırılana və İsrailin şimal bölgələrinin təhlükəsizliyi tam təmin olunana qədər qoşunların çıxarılması nəzərdə tutulmur.
Kats vurğulayıb ki, razılaşma İranın regiondakı təsirinə də ciddi zərbə vurur. O, Tehranın təzyiqlərinə baxmayaraq İsrailin Livandan geri çəkilmədiyini bildirib və əlavə edib ki, İran razılaşmanın həyata keçirilməsinə mane olmağa cəhd etsə, İsrail buna sərt cavab verəcək.
Nazirin sözlərinə görə, qarşıdakı əsas məsələ razılaşmanın tam icrasını təmin etməkdir və İsrail ordusu təhlükəsizlik zonasında uzunmüddətli fəaliyyətə hazırlaşır.
